's gaddingse Kalennerblaat  orrer  Huddel meddem "Tip fa's Lewe"

De Wegger rabbelt. Met halwert zugepetzde Aaue guck ich uff die Uhr. Ess es dann werklich schunn Zeit fa uffsesteije? Ich wuchde mich hoch, schlabbe in die Kich, stelle de Kaffee oo unn giehn met de Zeirung ins Bad. Dodenoo deck ich dann de Disch unn warde, daß mei Fraa unn die zwää Lauserde nookumme.

In de Kich on de Wand hummer e Kalenner hängge, ich glääb e Werwegeschenk vun de Abodeek. Uff dene sein ich jede Moje gespannt wie e Flitzebooe, weil do neemlich fa jede Daach e "Tip fa`s Lewe" druffstieht. Das macht mer werklich Pläseer. Mol gugge, was heit fa Rotschlaach unner`m Dadum stieht. Ich robbe dene Zeddel vun geschdern ab unn lese: "Wenn Sie einen Lebenspartner haben, sagen Sie ihm heute, daß Sie ihn gernhaben!"

Also, so ebbes, was soll das dann hääße? Ei, allemol hunn ich e "Lebenspartner", ich sein jo veheirat. Unn meiner Fraa soll ich soo, daß ich se geere hunn? Das wääß die doch, sunsch härrich se doch sellemols nit geheirat! Unn jetz, fuffzeh Johr noo de Hochzitt, soll ich dere das nommol extra soo? Ei, die hunn doch e Sprung in de Schissel! Derdoo Daach kann jo nix werre, wann der schunn so oofängt. De wivvelde ess`n heit iwwerhääbt? De zwedde Febber, mh, Aaueblick emol, de zwedde Febber? Ei, allemol, heit vor . . . sibbzeh Johr hunn ich mei Fraa es eerschde Mol getroff, sellemols war Mussik in de Tornhall, unn zwar Masgebaal. Das wääß ich noch wie heit. Es war Damewahl, unn se hot mich fa e Walzer gehol. Unn jetz gummol do, grad on deem Daach stieht grad derdoo Tip fa`s Lewe" uff`m Kalennerblaat. Das baßt jo grad gaddings fa heit. Wann se nooher on de Kaffeedisch kimmt, soon ich: "Mei Schatz, ich hunn dich lieb!" . . . Aaueblick emol, nää, so nit, das ess jo so ääfach unn abgelutscht. Das kann ich nit mache. Mh . . . wie wär`s met: "Du besch alles, was ich hunn!" Wähh, do siehn ich jo jetz schunn es Fett drobbse, das ess jo schmalzicher wie e Ringel Blutworscht! Nää, so aach nit. Mol schnell on de Bicherschrank unn geguckt, was die große Dichder bei so ebbes immer soo . . . Aaueblick . . . "Du bist mein Sinnen und mein Streben alle Zeit!" Nää, das aach nit, um Himmels Wille, nää. Ich breche mer doch kääner ab, das ess mer veel zu gladdisch. Do ess noch ebbes . . . "Liebste, Dir zu Füßen leg ich Tag und Nacht mein Herz!" Nää, so aach nit. Do rolle sich jo mei Fießneel uff. Hó, do deet se sich krumm unn schepp lache, wann ich ehr dodemet ookeem. Do muß ich halt weirer simeleere, om beschde, ich vebreche mer uff de Fahrt uff die Arwet noch e bissi de Kopp.

Allewei giehn die Rollaare hoch. Jetz awwer gedummelt unn de Kaffee ingeschenkt. Wann ich doch jetz nore e paar Blume hätt! Ich sein jo uff äämol ganz kriwwelich! Ob se aach droo denggt, was heit fa Daach ess? Jetz heer ich`s Getrabbel vun de Buwe, unn do stiehn se aach schunn alle drei in de Deer. Mei Fraa lacht, wie die Buwe "Babba" juukse, die Eermcher stregge ummer e Gemoje-Kuß gewwe.

Do, jetz, allewei gieht`s mer uff, allewei kimmt`s mer! Ich giehn met meiner Fraa on de Kalenner, zeije uff`s Kalennerblaat unn soon: "Du besch die Mudder vun unsere Kinn, ich kennt mer kää anner Fraa dodefor vorstelle."