Batsch ab, schlaa zu!

Als Pampersrocker hasche Spass,
hasch vor de Baukletzjer gesass,
ganz laut gejuukst unn ninngebess.
Ich hatt gebaut, du umgeschmess. 
Mei Hand, dei Batschhand, ich unn du.
Hunn veel gelacht! Batsch ab, schlaa zu! 

Met acht Johr `s Rädche rebareert,
die Hänn veschmeert, veschamereert.
Du hasch gehall, ich hatt geschafft.
Du hasch die Ruh, ich hatt die Kraft.
Meer harre’s hiekriet, ich unn du. 
Hot gut geklappt! Batsch ab, schlaa zu!

Beim Boule** dann, met verzeh Johr,
meer zwää als Mannschaft ingeschwor.
Ich hatt geschoss, du hasch geleet!
So manches Speel hummer gedreht!
Meer zwää sesamme, ich unn du.
Hunn oft gewunn! Batsch ab, schlaa zu! 

Kimmsch hääm vum Studium hie unn do,
machsch ball dei Priefung - unn denoo?
Schaffsch ball schun omme ann’re Ort 
unn ziehsch dann um, wohnsch weirer fort.
Meer siehn uns selde, ich unn du.
Muss wohl so sei . . .! Batsch ab, schlaa zu!