Em Jaab sei Leicht

Guck, de Bagger
vor de Wand!
'wei fängt er oo,
faau't wie e Dier,
reißt alles in.
Das lähme Haisi
hält nit stand.

In de Herbschtluft
walljert Stääb,
steijt huch enuff,
em Himmel zu.
Wer wääß, wuhie?
Mei Ohre werre
dusma dääb.

Bruchstää falle
kreiz unn quer.
E Balge dort
scheint blääch unn kalt,
leijt do erum,
wie, wann's e alder
Knoche wär.

"De Jaab, der Judd",
su pischbert ääns,
"hot do gewuhnt.
Gehul hot mer'n,
su ... korz vor'm Kriech.
Was aus em worr ess?
Das wääß kääns!"

De Stääb beißt bies,
mei Goorz gieht zu.
Noch ääner Schlaach ...
Das Jurrehaus
ess nimmi do!
Jetz gibt das U'dier
endlich Ruh.

Unn mei Aaue
werre feicht,
giehn huch enuff,
em Himmel zu.
's ess alles ruisch.
Mer määnt neegscht, 's wär em
Jaab sei Leicht.

Norbert Schneider

Bergstraße 43
55592 Rehborn
Deutschland

Fax:  +49 6753 962830
Tel.:  +49 6753 3358
E-Mail:  info@mundart-schneider.de

www.mundart-schneider.de

"... Norbert Schneiders Mundartarbeiten
kommen aus dem Herzen und
packen Leser wie Zuhörer ..."
Richard Walter