Herbschtglick

Herbschtnewwel walljert in de Luft. Die Sunn packt’s nit, e Loch in die Wolgedeck se reiße. Ich schaffe im Garde unn siehn driwwe, wie Millersch, die zwää alde Leitcher aus de Nochberschaft, derres Grumbeerkraut uff ääner Haufe rechele. Alles gieht zimmlich langsam, muss langsam gieh, weil de  Alfred unn die Gertrud schun alle zwää iwwer achtzich sinn. Se mache klääne Schrittcher, manchemol reiwe se ehr Areme unn kräckse e bissi, wann se sich bigge misse. Awwer ich kann mich nit entsinne, dass ich se irchendwann emol rich-dich lamendeere geheert hätt. Im Gejedääl: Seit ich die zwää kenne, hunn se immer e sefreerener Ausdruck im Gesicht. Es fällt kää äänzich Wort. Jedes wääß scheint’s noo so langer Zeit, was er se mache hot unn wo mer nanner oogreife muss. 

De Alfred hot e Planzbäämche unner’s Kichefenschder gestellt unn vesucht, met dem schwere eise Spade e Loch ausse- hewe. Wie ich siehn, dass er sich arich debei veschafft, giehn ich dorch dene Grenzpaad eniwwer unn soon zu em: „Lossen’t nor, ich helfe Eich“. „Was ess mer doch arem worr, frieer hot mer uff de Hitt met dem schwere Eise geschafft unn heit packt mer kää Spade mie se insesteche. Awwer so ess das halt im Alder. hau mer doch met de Schlaa aach noch de Stiggel eninn, dass das Abbelbäämche met dem Strick e bissi Halt kriet. Das Bäämche wolle mer setze, dass der ää, wo vun uns emol iwwerich bleibt, nit ganz allää ess, wann er aus em Fenschder in de Garde guckt“, seet de Alfred. 

Ich siehn, wie die Gertrud met e paar Grumbeere, wo se aus de Glut vun dem Grumbeerfeier gescherrt hot, eninn ins Haus gieht. „Allee“, seet de Alfred, „mer raume do noch es Zeich uff unn dann giehsche met eninn. Hmh . . . es ganze Johr frei ich mich uff diedoo Zeit met Feiergequellde unn wäächem Kees.“
 
Wie do grad die Sunn emol ganz korz dorch die Wolge linst, denk ich bei meer: Vleicht hunn se Glick, die zwää, unn dann  hunn se ab neegschde Herbscht zu dene Gequellde unn dem wääche Kees aach noch e paar Mol gedämbde Äbbel . . .

Norbert Schneider

Bergstraße 43
55592 Rehborn
Deutschland

Fax:  +49 6753 962830
Tel.:  +49 6753 3358
E-Mail:  info@mundart-schneider.de

www.mundart-schneider.de

"... Norbert Schneiders Mundartarbeiten
kommen aus dem Herzen und
packen Leser wie Zuhörer ..."
Richard Walter