In annere Umstänn ...
Seit so stigger zeje Woche
dun ich`s merge:
Es ess ebbes in mer drin,
wo die ganz Zeit nit do war.
Noo unn noo ess es gewachs,
kääner wääß ebbes devun,
es ess mei Gehäämnis.
Oogefang hot alles
vor e paar Monert,
wie meer zwää sesammeware.
Ich wuscht glei hinnenoo:
Allewei ess es basseert,
allewei hot`s geschnaggelt!
Das do bleibt nit ohne Folche!
Jede Daach speer ich,
wie`s noo meine Gedangge greift,
wie`s sich bräät macht
in meim Kopp.
Es ess schunn e Dääl vummer worr,
noo unn noo,
immer mie.
Hatt Bauchweh kriet,
wie ich`s e Zeitlang
nimmi gespeert hatt.
Awwer dann war`s wirrer do.
Was e Glick!
Es hätt jo kenne
fa immer fort sei.
Ob`s speerer,
wann`s drauß ess,
aach eschdemeert werd?
Das wääß mer nit!
Hoffe mer`s bescht,
es kann sich jo
so schlecht wehre.
Ball ess es reif,
dann kann ich`s nimmi halle,
dann muß es enaus,
ich dun`s ball nimmi pagge!
Awwer noch muß es wachse,
es fehlt noch ebbes,
es ess noch nit fa drauß!
Jetz kann`s nimmi lang dauere,
noch zwää, drei Daach!
Dann werd`s ferdich sei,
das Gedicht iwwer dich ...