Pälzer Abschiedslied - Hall dich munder!

Gehsch du als Pälzer fort
ziehsch on e annrer Ort
dann duusch du beschließe:
Willsch nit dei Herz veschließe
unn noch äämol grieße.

Saa nit: „Auf Wiedersehn!“
„Lass es dir wohl ergehn!“
Das kimmt jo nit vun inne, 
musch was annres finne
korz vorm Gehn.

Saa ganz ääfach: „Hall dich munder!“ 
„Mach’s dann gut! Ich war gern do!“ 
Das heert sich so freindlich oo. 
Immer, wammer
dene Gruß kriet
ess das wie e scheenes Lied,
wo ääm dief ins Herzje zieht.
Nää, das vegißt mer nie,
das ess dann wie e aldi Melodie.
Saa beim Abschied: „Hall dich munder!“
Mer sieht sich e anner Mol:
Tringgen’t all uff mei Wohl . . .

Dass mer mol Abschied nimmt
unn nimmi sammekimmt,
das gibt’s halt im Lewe.
oft leijt mer denewe
jo, so ess das ewe.

Unn irchendwann ess Schluss,
weil mer sich trenne muss.
E neier Schatz kimmt bei dich,
unn gibt dann ganz fleißich
deer e Kuss.

Saa ganz ääfach: „Hall dich munder!“
. . . 

Uff äämol merksche doch,
dei Zeit ess oogebroch,
du werrsch alsfort älder 
unn dei Blut werd kälder
dei Lewensbääm, ball fällt er.

Unn kimmt de Sensemann,
dorchkreizt dei Lewensplan.
ess nor e Weechbereider.
Es geht trotzdem weider
irchendwann.

Saa ganz ääfach: „Hall dich munder!“
. . . 

Norbert Schneider

Bergstraße 43
55592 Rehborn
Deutschland

Fax:  +49 6753 962830
Tel.:  +49 6753 3358
E-Mail:  info@mundart-schneider.de

www.mundart-schneider.de

"... Norbert Schneiders Mundartarbeiten
kommen aus dem Herzen und
packen Leser wie Zuhörer ..."
Richard Walter