Speerer Herbscht*

Guck, die zwää Alde schaffe dert im Garde.
Sie häggelt, krätzt die Aajerpetsch im Pad.
Er bickt sich, stecht de eerschde Feldsalad,
will vor de Mauer dodenoo noch spade.

Vederrdes Grumbeerkraut leijt uff de Länner,
do uff de Trepp leijt's Fix-Feier parad.
Unn's Weißkraut muss noch aus. Es wär jo schad,
wann das vorm Froscht keem nimmi in de Stänner.

Sein schranggelich, se mache klääne Schritt.
Es Schaffe fällt ne schwer, se klaae nit.
Nor manchmol dun se sich de Arme reiwe.

Es fällt kää Wort. Die zwää sein ingespeelt
seit ewich unn drei Daach. Nor ää Sach queelt:
De Winder kimmt, ääns muss dann iwwrich bleiwe . . .

* 2006 beim 54. Mundartdichterwettstreit der Gemeinde Bockenheim ausgezeichnet.