Uff`m Flohmart ...

Letschde Samschdaach Moje hot mei Fraa im Keller uffgeraumt unn do hot se beim Meddaachesse gemäänt, se hätt e Haufe alder Kruusch vumeer in e Plastiksack gesteckt unn dann in die Milltonn geschmess. Unn dann saat se noch, se hätt dodebei so de Raasch kriet, dass se om Nummedaach noch uff em Speicher weirermache wollt, dert deet neemlich noch mie so Amberaasch erumfliee. Wie ich das geheert hunn, sein ich wie vun de Stobbnool gestoch uff, sein on die Milltonn gerennt unn hunn noogeguckt, was ich vleicht noch redde kennt. Ach du mei liewer Gott, was war do alles fa Zeich drin, wo ich niemols im Lewe ääfach so fortschmeiße deet: e alt Wachsbild aus meiner Studendezeit, e Blumevas aus de sibbzicher Johre. Jo alla, es war e bissi die Glasur abgesprung, awwer dodeweje beferdert mer doch nit glei so e Stick. Neegscht lauder so Sache ware in dem Sack vestaut. Gut, ich siehn`s jo in, dass mer nit alles uffhewe kann, awwer ääfach fortschmeiße, das gieht doch nit. So alt Zeich ess doch heitsedaachs gesucht ... Do hunn ich beschloss, uff de neegschde Flohmart se fahre unn das Zeich se vescherwele. Uff die Art kreecht ich wenichdens noch e paar Mark defor, die deerich dann de Kinn in die Sparbichs werfe.
Ich hummer dann drei Bananekaschde aus em Subermart gehol unn sein sunndaachs mojens uff de Flohmart. Dert hunn ich das Zeich schee hiegestellt unn uffgebaut unn dann druff gewart, dass mer die Leit das Zeich nore so aus de Hänn reiße. Met de Zeit ess mer`s zimmlich langweilich worr unn do hunn ich mich - mei eichener Stand nadeerlich immer im Aau - runderum e bissi umgeguckt.
Was es do alles gebb hot! E Haufe Zeich, wo gar nit uff e Flohmart geheert orrer wo doch kääns kääft wie e alt rußisch Eeleewelche orrer der ganze elektrische Krom orrer Butzmiddel fa`s Audo orrer so Kitsch wie die Mudder Goddes met Inne- beleichdung ... Awwer aach scheene Sache ware debei. Om Nochberstand hot`s alde Bicher vun vor`m Kriech gebb, so e alt zingge Millichkann unn e Haufe alde Rogg`n-Roll-Pladde vum Elvis. So Sache muss mer sich glei unner de Naal reiße, nit dass e annerer keem, wo ääm so ausgesuchde Sache vor de Nas ewegschnabbe deet. Noch e paar annere Schnäbbcher hunn ich gesieh, unn glei hunn ich zugeschlaa.
So geje sechs Uhr hunn ich dann mei Stand abgebaut unn mei Zeich ingepackt. Es Geschäft war nit so gerollt, wie ich mer das vorgestellt hatt. Kaum, dass ich drei Sache vekääft hatt. Jetzt, was war das!? Mei drei Bananekaschde hunn uff äämol nimmi gelangt. Ei Dunnerkeil, gibt`s dann so ebbes, awwer zum Glick hatt jetz mei Nochber zwää Kaschde iwwerich, unn do horrer mer se grad gebb. Irchendwie war das dumm gelääf met dem Flohmart, awwer die Hauptsach war, dass ich e paar Schnäbbcher gemach hatt.
Wie ich met meine finf Kaschde häämkumm sei, hot mei Fraa die Hänn iwwerm Kopp sammegeschlaa unn hot nore noch gelacht. Die Aaue hunner Wasser gebb, wie se saat: "Wann du noch dreimol uff de Flohmart giehsch, fa alt Amberaasch se vekääfe, ich glääb, dann misse mer om Enn noch oobaue."

Norbert Schneider

Bergstraße 43
55592 Rehborn
Deutschland

Fax:  +49 6753 962830
Tel.:  +49 6753 3358
E-Mail:  info@mundart-schneider.de

www.mundart-schneider.de

"... Norbert Schneiders Mundartarbeiten
kommen aus dem Herzen und
packen Leser wie Zuhörer ..."
Richard Walter